Padre Nuestro pequeniño
En Taragoña,
ao pé do fogo
na casa
que de ela foi
e, como ela, xa non,
a bisavoa Lola
coñeceu moitas tardes
ca miña nai
xa medrados
os seus parruliños.
E no lume
da lareira,
ao calor,
regou o seu corazón
con risas,
contos,
cantos
e oracións
coma a que aquí
vos traio.
Polo que ela foi
Polo que eles son
Polo que vive en min.
Padre Nuestro pequeniño
Lévame polo bó camiño
Alá fun alá irei
3 Marías encontrei
Prejuntando por Jesús
E Jesús está na crus
E na crus e no altar
cos peiños a sangrar.
Chamando por Madalena
que llos viñese limpar.
Tente, tente, Madalena
Non me veñas lastimar
Que éstas son as 5 llajas
Que por ti han de pasar
Coma as areiñas no Mar.
Intro: Nereida, 20200822.
Padre Nuestro: 1975 Taragoña, Rianxo.
Abuela Lola - Recollido pola sua neta.